Aktuale

Më 19 shkurt 2025, Gjykatësja e Procedurës Paraprake në çështjen gjyqësore për vepra penale të administrimit të drejtësisë kundër Thaçit dhe të tjerëve hodhi poshtë kërkesën e dytë për lirim të përkohshëm të Hashim Thaçit për arsye humanitare. Sikurse herën e kaluar, Gjykatësja konstatoi se Thaçi nuk ka demonstruar se ekzistonin arsye  të jashtëzakonshme dhe bindëse që përligjnin lirimin e përkohshëm të tij. Versionin e redaktuar publik të këtij vendimi, të dorëzuar më 25 shkurt, mund ta gjeni këtu.

Korniza ligjore e Dhomave të Specializuara të Kosovës u mundëson personave të paraburgosur që të bëjnë kërkesa për vizitë nën mbikëqyrje në Kosovë kur ka arsye humanitare bindëse. Gjykatësit përkatës vendosin për çdo kërkesë të tillë duke u bazuar në informacionin e dhënë në momentin kur bëhet kërkesa.

Më 25 shkurt 2025, Trupi Gjykues në çështjen gjyqësore Thaçi dhe të tjerët lëshoi vendimin mbi kërkesën e katër ekipeve të Mbrojtjes, me anë të cilës kërkohej që Trupi Gjykues të merrte masa për të siguruar paanësinë e procesit dhe për të shmangur dëmin ndaj të akuzuarve. Konkretisht, kërkesa e Mbrojtjes trajton mënyrën e marrjes në pyetje prej Trupit Gjykues të dëshmitarëve të ZPS-së, duke pretenduar ndër të tjera, se krijon perceptim të anshmërisë. 

Trupi Gjykues mori parasysh kundërshtimet e Mbrojtjes, por hodhi poshtë kërkesën, duke konstatuar se marrja në pyetje nga gjykata nuk shkeli të drejtat e të akuzuarve as nuk do të çonin një vëzhgues të informuar arsyeshëm për të perceptuar arsyeshëm anshmëri. Më shumë hollësi mund të gjeni në vendimin e lëshuar nga Trupi Gjykues.

Ky është vendimi i dytë në këtë çështje gjyqësore lidhur me kundërshtimet e Mbrojtjes se si Trupi Gjykues mori në pyetje dëshmitarët. Vendimin e parë e lëshoi Paneli i Gjykatës së Apelit  në korrik 2023, kur kërkesa e Mbrojtjes gjithashtu u hodh poshtë.

Më 25 shkurt 2025, Paneli i Gjykatës Supreme, i përbërë prej gjykatësve Ekaterina Trendafilova (Kryegjykatëse), Kristinë van den Vajngart, dhe Daniel Fransen, hodhi poshtë kërkesat për mbrojtje të ligjshmërisë që parashtruan Mustafa dhe ZPS-ja. Këto kërkesa u dorëzuan në lidhje me vendimin e Gjykatës së Apelit të datës 10 shtator të vitit të kaluar, në të cilin u shqiptua dënimi i ri për Mustafën.

Ndër pika të tjera, Paneli konstatoi se Mustafa nuk identifikoi pse dënimi me 15 vjet burgim përbën shkelje të së drejtës penale. Në lidhje me kërkesën e ZPS-së, Paneli konstatoi se thjesht mospajtimet me vendime të caktuara nuk përmbushin standardin rigoroz i cili kërkohet që një kërkesë për mbrojtje të ligjshmërisë të ketë sukses.  

 Më shumë informacion mund të gjeni në vendimin e Panelit.

Pas përfundimit të dëshmisë së dëshmitarit të 123-të të Prokurorisë Ismet Tara këtë pasdite, gjykimi u mbyll për sot dhe për këtë javë. Anulohen seancat e 26 dhe 27 shkurtit. Gjykimi do të rifillojë të hënën, 17 mars 2025, në orën 09:00.

Dëshmitari i ZPS-së Ismet Tara rifillon dhënien e dëshmisë këtë mëngjes. Pas kërkesës së djeshme të dëshmitarit, sot ai shoqërohet nga një mbrojtës kujdestar. Njoftimi i Administratores për caktimin e tij është i disponueshëm këtu.

Pas vendimit të Trupit Gjykues për t’i dhënë kohë shtesë Mbrojtjes për të bërë parashtrime mbi provat e propozuara të paraqitura nga ZPS-ja në lidhje me dëshmitarin aktual, gjykimi në çështjen Thaçi dhe të tjerët është mbyllur për sot. Ai do të rifillojë nesër, më 25 shkurt, në orën 09:00, kur pritet të fillojë marrja në pyetje e dëshmitarit Ismet Tara nga Mbrojtja. 

Këtë mëngjes ka nisur dhënien e dëshmisë dëshmitari i ri i ZPS-së, Ismet Tara. Deri më tani, ky është dëshmitari i 123-të i ZPS-së në gjykatë.  

Më 19 shkurt 2025, Kryetarja e DHSK-së Trendafilova vendosi modifikimin e dënimeve të Sabit Januzit dhe Ismet Bahtijarit dhe mundësoi lirimin e tyre më 21 shkurt 2025, sipas disa kushteve të caktuara. Më shumë hollësi në Komunikatën për shtyp dhe në vendimet e Kryetares (Januzi; Bahtijari).

Pas vendimit të Trupit Gjykues në çështjen Januzi dhe të tjerët më 4 shkurt, Administratorja e DHSK-së njoftoi se shuma e zhdëmtimit prej gjithsej 500 euro i është transferuar Viktimës 1 brenda afatit të caktuar kohor. Më shumë detaje në Raportin e Administratores.

Transkripti i informimit të sotëm javor të DHSK-së për median ndodhet këtu.